कोल्हापूर जिल्ह्यात दिनांक २८ जुलै २०२४ रोजी राष्ट्रपती द्रौपदी मुर्मू यांचा दौरा आयोजित केला आहे. या दौऱ्यादरम्यान मुख्यमंत्री, उपमुख्यमंत्री आणि इतर मंत्रीही उपस्थित राहण्याची शक्यता आहे. राष्ट्रपतींच्या दौऱ्यादरम्यान संरक्षित व्यक्तिंच्या सुरक्षेच्या दृष्टीकोनातून कोल्हापूर जिल्ह्यातील काही ठिकाणी ड्रोन कॅमेरा चित्रिकरणास बंदी घालण्यात आली आहे.

या ठिकाणी सावित्री मिनरल वॉटर प्लांट ऑफ सावित्री महिला औद्योगिक सहकारी संस्था, शोभाताई कोरे वारणानगर, महिला गृह उद्योग लिज्जत पापड ब्रँच वारणानगर कोडोली, विमानतळ, श्री अंबाबाई/ महालक्ष्मी मंदिर, शासकीय विश्रामगृह कोल्हापूर इत्यादी स्थळांचा समावेश आहे.

भारतीय नागरिक सुरक्षा संहिता २०२३ च्या कलम १६३ अंतर्गत अपर जिल्हादंडाधिकारी संजय तेली यांनी या स्थळांवर ड्रोन कॅमेरा चित्रिकरणास बंदी घातली आहे. हा आदेश सुरक्षिततेच्या दृष्टिकोनातून घेतलेला आहे आणि त्याचे काटेकोरपणे पालन करणे अनिवार्य आहे. या दौऱ्याच्या वेळी सुरक्षेच्या उपाययोजनांच्या अंतर्गत या नियमांचे पालन करण्यात येईल. नागरिकांनी या नियमांचे पालन करून सहकार्य करावे असे प्रशासनाचे आवाहन आहे.